電影〈戀愛起義〉的句號

還記得結尾的這一段嗎？

最近我做咗好多唔應該做嘅事
鍾意咗一個唔應該鍾意嘅人　等一個唔應該等嘅所謂機會
嘥咗一啲唔應該嘥嘅時間　諗埋一啲唔應該諗嘅野
去咗一啲唔應該去嘅地方　食咗一啲唔應該食嘅野
番咗一個唔應該番嘅屋企　同埋上過一張唔應該上嘅床
然後大家又做咗好多唔應該做嘅事
之後大家都覺得唔應該咁繼續落去
唔知自己想點　淨係知自己唔想點
例如唔想俾人知道我同佢之間嘅事啦
唔想大家走唻走去唔知為乜
唔想你搵我　我搵你
唔想唔誠實啦　唔坦白　唔見得光　唔想有秘密
都唔係好想知其實大家有幾鍾意大家　總之高興就得喇
我唔想太認真啦　但又唔想玩玩下
我都唔係好想知道一啲　我唔應該知道嘅事
其實我同佢應該係見少啲面好啲唔應該鍾意
唔應該傷害　唔應該發生嘅　唔應該開始　唔應該結束
我知我唔應該再搵佢　但係我又好想知道
佢會唔會因為我而唔開心
每逢我一個人嘅時侯我就響度諗　到底我應該想點？
最近我好鍾意一個人　自己一個人
一個人四圍去　一個人開工　一個人收工　一個人去食飯
一個人去飲野　一個人哩埋響屋企亂禁個搖控
夜晚一個人上網　有時一個人跑步　一個人去打機
一個人去做gym　一個人去卡拉ok　一個人去睇戲
間唔中一個人砌下模型　星期六晚一個人去party　跟住一個人聽歌
一個人跳舞　一個人流汗　一個人離開　一個人上車
跟住一個人番到屋企　一個人開心唔開心大笑大叫
連續好多日都係一個人
一個人有好多好處就係唔駛有任何責任
唔駛有咁多包袱
每日二十四小時都係屬於自己
個世界幾時開始幾時停　完全係由我一個人話事
我鍾意去邊就去邊　做咩野就做咩野
我鍾意點就點　總之我鍾意就得喇
我鍾意一個人
其實我唔係好肯定我係鍾意一個人定係鍾意兩個人
有件事我一路都諗唔清楚
就係到底我同佢一齊開心啲丫？　定係自己一個開心啲？
呢個問題似乎係一個人搵唔到答案
最近我時時都係一個人　得番一個人
無無聊聊又一個人咁啦　行行企企又一個人
開唔開心都係一個人　自己．．．　一個人．．．
諗起兩個人嘅畫面　我地一齊食飯啦　一齊行街
一齊番屋企　一齊生活　用同一條毛巾
用同一隻水杯飲同一啖水　上同一張床
一齊開心　一齊開始　跟住
又一齊去食飯　一齊行街　一齊過馬路
一齊停低　一齊番屋企　用同一個洗手間
上番同一張床做番同樣嘅動作
一齊無無聊聊又一個下晝
跟住一齊睇VCD　一齊恰下啦　一齊諗下將來
一齊傾計　一齊諗下之前發生咩事　一齊諗下之後又發生咩事
到底應唔應該一個人呢？　定係兩個人好啲？
一個人開心啲？　定係兩個人開心啲？
一個人？　兩個人？